Bul:

H90.3 - eki tárepleme neyrosensorlıq esitiwdiń joǵalıwı, yaǵnıy "ótkeli" emes, esitiw apparatlarınıń ózi zıyanlanǵan: ishki qulaq, esitiw nervi yamasa miydiń  esitiw orayları.

IV dáreje (awır/tereń) esitiw bosaǵası shama menen 71-90 dB bolǵanda: bala ádettegi sóylewdi derlik esitpeydi, hátte onıń qasında sóylesse de, tek júdá úlken sesler (qulaqtaǵı shawqım, sirena, esiktiń qaǵılıwı) ajıralıp turadı.

Tiykarǵı belgileri:

Kútá awır dárejedegi  esitpeytuǵın balada:

- sóylewshini kórmese atı menen aytıwına juwap bermeydi;

- hár dayım sóylewshige jaqınlasadı, erinlerine qaraydı, tez-tez qaytalap soraydı;

- sóylew kesh qáliplesedi: sózler az, sóz dizbekleri teńleslerinen kesh payda boladı, sóylew maylanǵan, buwınlardı " jutadı";

- televizor/planshetti júdá qattı qoyadı, ózi basqalardan qattıraq sóyleydi.

Bir jasqa shekemgi kishkentaylarda qattı seslerge reakciyasınıń joqlıǵı, gúbirleniwiniń joqlıǵı yamasa sóz baylıǵınıń tómenligi.

Múmkin bolgan sebepler:

Sebepleri kóp, hámme waqıtta da birewin tabıw múmkin emes.

Tuwma:

- gereńliktiń genetik variantları, sonıń ishinde sindromlarda;

- hámiledarlıq waqtında anasındaǵı infekciyalar (qızılsha, citomegalovirus hám basqalar);

- hámileniń awır gipoksiyası, tuwılıwda júdá az salmaq, asqınǵan tuwıw.

Keyin payda bolǵanlar:

- awır infekciyalar (meningit, tepki, qızılsha hám basqalar);

- ototoksik dáriler;

- bas jaraqatları, kúshli akustikalıq tásir, ishki qulaqtıń qan menen támiyinleniwiniń buzılıwı.

Ulıwma princip: ishki qulaqtıń túkli kletkaları hám/yamasa esitiw nervi zıyanlanǵan - olar endi dawıstı miyge kerekli dárejede ótkermeydi.

Diagnoz kóbinese neshe jasta qoyıladı?

Skrining sisteması jaqsı bolǵan jaǵdayda (JDSSh hám milliy baǵdarlamalar usınıs etedi):

- esitiwdi tuwıw úyinde tekseriw múmkin;

- awır túrdegi  eki tárepleme awırıw diagnozı 2-3 aylıqqa shekem tastıyıqlanadı;

- reabilitaciya (apparatlar, implantlar, shınıǵıwlar) 6 ayǵa shekem baslanadı.

Skrining jaman isleytuǵın jerlerde gúman keyinirek - 1,5-3 jasta, sóylewdiń kesh qalıwı hám seske "ersi" reakciyalar kórinetuǵın waqıtta payda boladı.

Balanı qollap-quwatlaw. Balaǵa qalay járdem beriw kerek?

Komanda kerek: surdolog, LOR, pediatr/nevrolog esitiw hám emleniwdi turaqlı baqlap baradı. Balaǵa esitiw apparatları yamasa koxlear implant qansha erte berilse, normal sóylew imkaniyatı sonsha kóp boladı.

Este saqlaw kerek!

IV dárejeli esitpewshilik - bul júdá awır, biraq, eger járdem erte baslansa, bala solay da sóyley aladı hám oqıy aladı.

6 ayǵa shekem - altın dáwir: qurallar/implant hám sabaqlar qanshelli erte bolsa, sóylew de sonshelli jaqsı boladı.

Jasaw ornındaǵı emlew-profilaktikalıq mákemelerde balalar psixonevrologları, logopedler tárepinen qánigeli konsultaciya beriledi.

Pedagogikalıq jumıs 2 jastan qánigelestirilgen mektepke shekemgi bilimlendiriw shólkemlerinde, 7 jastan qánigelestirilgen bilimlendiriw mákemelerinde alıp barıladı.

Joqarıdaǵı mákemelerge rásmiylestiriw ushın, juwmaq alıw ushın "Insan" sociallıq oraylarına múrájat etken halda psixologiyalıq-medicinalıq-pedagogikalıq komissiyasınan ótiwi  kerek.