Bul

Balalar cerebral paralichi (BSP, G80) - bas miyiniń jaraqatlanıwı sebepli balanıń háreketleri, halatı hám koordinaciyası buzılatuǵın jaǵday.

Tiykarǵı belgileri

Hár qıylı balalarda BSP túrlishe kórinedi, biraq kóbinese tómendegiler baqlanadı:

- motor rawajlanıwınıń artta qalıwı (keyin basın uslaydı, awdarıladı, otıradı, júredi);

- ádetten tıs bulshıq et tonusı: hádden tıs kerilgen  (spastik) yamasa kerisinshe, bos bulshıq etler;

- qolaysızlıq, júriwde, koordinaciyada, teńsalmaqlılıqta qıyınshılıqlar;

- tábiyiy emes halatlar, ayaqlardı ayqastırıw, "ayaq ushında" júriw;

Qosımsha tómendegiler bolıwı  múmkin:

- sóylew, jutıw buzılıwları;

- kóriw hám esitiwdegi mashqalalar;

- epileptik pristuplar;

- intellektual qıyınshılıqlar (biraq balalardıń bir bólimi normal intellektke iye).

Múmkin bolǵan sebepler

Hámiledarlıq dáwirinde:

- ananıń sozılmalı kesellikleri;

- jatır ishindegi infekciyalar;

- joldas (placenta) qan aylanıwınıń buzılıwı, gipoksiya (kislorod jetispewshiligi);

- hámiledarlıqtıń awır asqınıwları.

Tuwıw waqtında:

- asfiksiya (buwınıw);

- tuwıw jaraqatları;

- júdá tez yamasa kerisinshe, sozılǵan tuwıw, múddetinen burın tuwılıw.

Tuwıwdan keyin:

- miydiń awır infekciyaları (meningit, encefalit);

- balada insult;

- bas miy aymaǵınıń awır jaraqatları.

Kóbinese bir neshe faktorlar bir waqitta ushirasadı.

Diagnoz kóbinese neshe jasta qoyıladı

Birinshi signal  balanıń tuwılıwınıń birinshi aylarında kórinedi (basin uslay almaydı, "áste háreket etedi yamasa qattı sharshaǵan bala) .

Kóbinese 1 jastan 3 jasqa shekemgi balalarda BSP diagnozı anıqlanadı.

Balanı qollap-quwatlaw

BSFda járdem - qánigelerdiń turaqlı hám jámáátlik jumısı:

- nevrolog - baqlaydı, diagnoz qoyadı, zárúr bolsa dári-dármaqlar buyıradı (tutqanaq, spastiklik hám basqalar ushın);

- fizioterapevt, DJT instruktorı, reabilitolog - shınıǵıwlar, vertikalizaciya hám júriwdi úyretiw menen shuǵıllanadı;

- logoped, defektolog, psixolog, ergoterapevt - sóylew, pikirlew, ózine-ózi xizmet kórsetiw, oyın hám qarım-qatnas kónlikpelerin rawajlandıradı;

- ortoped - buwınlar hám omırtqa baǵanasın qadaǵalaydı, ortezlerdi tańlaydı, zárúr bolsa xirurgiyalıq emlewlerdi usınıs etedi.

Ata-analardıń roli:

- qánigelerdiń usınıslarına ámel etip, bala menen turaqlı shuǵıllanıw;

- balanıń hár qanday aktivlik háreketlerin qollap-quwatlaw.

Reabilitaciya qansha erte baslansa, bala sonsha kóp kónlikpelerdi ózlestire aladı.

Este saqlaw kerek!

BSP jası ótken sayın kúsheymeydi, biraq reabilitaciya bolmasa ekilemshi mashqalalar (kontraktorlar, deformaciyalar, skolioz) payda bolıwı múmkin.

BSP menen kesellengen kóplegen balalar qollap-quwatlaw hám reabilitaciyalaw shárti menen júriwi, oqıwı, sóylesiwi, islewi hám maksimal dárejede erkin bolıwı múmkin.

Diagnozdi tek ǵana nevropatolog shıpaker qoyadı.

Jasaw ornı boyınsha emlew-profilaktika mákemelerinde ortoped-travmatologlar tárepinen zárúr  másláhát beriledi.

Reabilitaciya tómendegi basqıshlarda ámelge asırıladı:

- 2 jastan - qánigelestirilgen mákemelerde (mektepke shekemgi bilimlendiriw shólkemleri);

- 3 jastan - mektepke shekemgi bilimlendiriw shólkemleriniń inklyuziv toparlarında;

- 7 jastan - ulıwma bilim beriw hám qánigelestirilgen mekteplerdiń inklyuziv klasslarında.

Joqarıdaǵı mákemelerge jaylastırıw ushın psixologiyalıq-medicinalıq-pedagogikalıq komissiyadan ótiw zárúr. Bunıń ushın "Insan" sociallıq xızmet oraylarına múrájat etiledi.