Bul

Nistagm - bala ózin basqara almaytuǵın kózdiń (shepke-ońǵa, joqariǵa-tómenge, sheńber boylap) ıqtıyarsız ritmli háreketleri.

Sol sebepli súwret "silkinedi," miyda kórinis buzıladı hám kóriw júkleme menen qáliplesedi. XKB-10 da nistagm H55 kodı astında kórsetiledi.

Tiykarǵı belgileri

Balanıń kózleri "juwıradı," ol oyınshıqqa qarap tura almaydı, kóbinese kózin qıysaytadı yamasa uzaq waqıt qarap turadı. Bala basın jaqsı kórgen tárepke eńkeytiwi yamasa burıwı múmkin - sonda kózleriniń háreketleri ázzileydi hám onıń kóriwi ańsatlasadı.

Úlkenirek jastaǵı balalarda "qaltırawshı háriplerge," oqıwda tez sharshawǵa, bas aylanıwına, qıysıqlıqqa, "jalqaw kóz"ge (ambliopiya) shaǵımları payda boladı.

Múmkin bolǵan sebepler

Kishi jastaǵı balalarda nistagm kóbinese kóz (tuwma katarakta, tor perde kesellikleri, albinizm, kóriw nervi kúshsiz, jaqınnan yaki uzaqtan kóriw kúshli) yamasa nerv sisteması menen baylanıslı (hámiledarlıq hám tuwıwdaǵı gipoksiya, miy kemislikleri, óspeler, gidrotsefaliya, BSJ).

Birneshe shańaraq aǵzalarınıń "kózleri qaltıraytuǵın" násillik variantları da bar.

Mektep oqıwshıları hám óspirimlerde nistagm bas jaraqatlanıwı, ishki qulaq kesellikleri, tarqalǵan skleroz, insult, awır záhárleniwler, ayırım dáriler fonında payda bolıwı múmkin.

Qaysı jaslarda kóbirek diagnoz qoyıladı

Tuwma (infantil) nistagm ádette 2-4 aylıqta, bala ana júzine hám oyınshıqlarǵa isenim menen qarawı kerek bolǵan waqıtta seziledi.

Kózdiń awır keselliklerindegi sensor nistagm kóbinese ómiriniń birinshi jılında anıqlanadı.

Keyninen payda bolǵan formalardı vrachlar kóbirek  mektepke shekemgi hám mektep jasındaǵı balalarda anıqlaydı, bunda balanıń ózi "qaltırawshı súwretke" hám oqıw hám jazıwdaǵı qıyınshılıqlarǵa shaǵım ete baslaydı.

Balanı qollap-quwatlaw

Eń tiykarǵısı kútip qalıw emes, múmkin bolǵanınsha balalar oftalmologı hám nevropatologına kórsetiw.

Tolıq diagnoz (kózáynek/linzalar, tor perdeni tekseriw, zárúr bolsa MRT) hám tiykarǵı sebepti emlew, geyde kóz bulshıq etlerinde operaciya ótkeriw kerek.

Kózdi ayaw, baqsha hám mektep penen bala ushın doskaǵa jaqın jer hám tayanısh haqqında kelisiw hám Ózbekstandaǵı arnawlı balalar oftalmologiya oraylarına múrájat etiw áhmiyetli.

Este saqlaw kerek!

Nistagm óltirmeydi, biraq shıpakerlersiz balanıń kózi hám isenimin "óltiriwi" múmkin.

Bul "kosmetika" yamasa "tek ǵana nervler" emes, al kózler hám/yamasa nerv sisteması járdemge mútájligi haqqındaǵı áhmiyetli signal.

Eger óz waqtında tekserip, kóz áynegin tańlap, bala menen shuǵıllanıp, kerek bolsa operaciya islense, nistagm menen kesellengen balalardıń kópshiligi normal bilim alıp, kitap oqıp, telefonnan paydalanıp, ádettegidey turmıs keshirip atır.

Jasaw mánzilindegi emlew-profilaktika mákemelerinde balalar oftalmologları tárepinen zárúr  másláhát beriledi.

Reabilitaciya tómendegi basqıshlarda ámelge asırıladı:

- 2 jastan - qánigelestirilgen mákemelerde (mektepke shekemgi bilimlendiriw shólkemleri);

- 3 jastan - mektepke shekemgi bilimlendiriw shólkemleriniń inklyuziv toparlarında;

- 7 jastan - ulıwma bilim beriw hám qánigelestirilgen mekteplerdiń inklyuziv klasslarında.

Joqarıdaǵı mákemelerge jaylastırıw ushın psixologiyalıq-medicinalıq-pedagogikalıq komissiyadan ótiw zárúr. Bunıń ushın "Insan" sociallıq xızmet oraylarına múrájat etiledi